شاداں ہے دل تو آنکھ بھی حیراں ہے دوستا
جو کچھ نہاں تھا ہوگیا عیاں اے دوستا
پاپوش زیرِ پاءِ پاسباں ہے دوستا
وہی تو ہے جو اصل حکمراں ہے دوستا
اک بار جب غلام تیرے بولنے لگے
پھر جانئے وہ کب رکیں، کہاں اے دوستا
ہم کو ہمارے دشمنوں کی جانچ ہو چکی
ہم کو یہ مت بتایئے فُلاں ہے دوستا
ہے حکم اب تو اس کی بھی تعظیم کا ہمیں
تکریم واجبِ سگِ سلطاں ہے دوستا
تب یوں ہوا کہ سعد کا بھی راز کھل گیا
کھولی جب ایک چور نے دکاں اے دوستا
ہے سچ ہمیں اک عمر تک مغالطہ رہا
ہے سر پہ اپنے اپنا آسماں اے دوستا
جو دیکھئے تو سب سرِدیوار ساتھ ہیں
پسِ دیوار اک اور داستاں ہے دوستا
دستار ان کو دیجیو تو دیکھ بھال کر
شانے پہ ان کا سر ہے یا نشاں ہے دوستا
اک بار شرم، لاج کا جھاکا جو کھل گیا
پھر کام آئے گی نہ غوں یہ غاں اے دوستا
ہم شاہ کے غلام، ہم کو معاف کیجئے
ہم چپ رہیں گے چپ میں ہی اماں ہے دوستا
وہ بات راز کی جو صرف کی تھی آپ سے
کیوں خاص و عام کی زدِ زباں ہے دوستا
مت دوسروں کی زندگی میں زہر گھولئے
خوش رہنے دیجئے جو ہے جہاں ہے دوستا
نیچے زمیں نا سر پہ آسماں ہے دوستا
ایسا نصیبا اپنا، الاماں اے دوستا
