1. ہوم/
  2. نوحہ/
  3. فاخرہ بتول/
  4. مجھے جا کر سُلانے دو سکینہ ع رو رہی ہو گی

مجھے جا کر سُلانے دو سکینہ ع رو رہی ہو گی

مجھے جا کر سُلانے دو سکینہ ع رو رہی ہو گی

اُسے لوری سُنانے دو سکینہ ع رو رہی ہو گی

چلو اصغر ع نہیں لوٹا , وہ پیاسا سو گیا شاید

مجھے شعلے بجھانے دو سکینہ ع رو رہی ہو گی

بہت زخمی ھے کانوں سے ابھی تک خون جاری ھے

مجھے مرہم لگانے دو سکینہ ع رو رہی ہو گی

بہت کمسن ھے تنہا قید میں وہ جی نہیں سکتی

مجھے زنداں میں جانے دو سکینہ ع رو رہی ہو گی

مری بچی کے نیلے ہیں زرا رخسار دیکھو تو

کلیجے سے لگانے دو سکینہ ع رو رہی ہو گی

بہت تاریک زنداں ھے مری بچی اکیلی ھے

مری بچی کو آنے دو سکینہ ع رو رہی ہو گی

شمر کے نام سے تو کانپ اُٹھتی ھے مری پچی

تسلی ہی دلانے دو سکینہ ع رو رہی ہو گی

مجھے اصغر ع کے مرنے کا یقیں اب تک نہیں آتا

ابھی جھولا ہلانے دو سکینہ ع رو رہی ہو گی


فاخرہ بتول

فاخرہ بتول نقوی ایک بہترین شاعرہ ہیں جن کا زمانہ معترف ہے۔ فاخرہ بتول نے مجازی اور مذہبی شاعری میں اپنا خصوصی مقام حاصل کیا ہے جو بہت کم لوگوں کو نصیب ہوتا ہے۔ فاخرہ بتول کی 18 کتب زیور اشاعت سے آراستہ ہو چکی ہیں جو انکی انتھک محنت اور شاعری سے عشق کو واضح کرتا ہے۔ فاخرہ بتول کو شاعری اور ادب میں بہترین کارکردگی پر 6 انٹرنیشنل ایوارڈز مل چکے ہیں۔