1. ہوم
  2. غزل
  3. شاہد کمال
  4. کیا کرتے کہ اقرار کی صورت بھی نہیں تھی
Shahid Kamal

کیا کرتے کہ اقرار کی صورت بھی نہیں تھی

کیا کرتے کہ اقرار کی صورت بھی نہیں تھی
ہم کرتے جو انکار یہ جرأت بھی نہیں تھی

رویا ہوں بہت دیر تلک تجھ سے بچھڑ کر
مجھ کو تو مگر تجھ سے محبت بھی نہیں تھی

وہ دن بھی عجب دن تھے فراغت کے شب و روز
جیتے تھے مگر جینے کی فرصت بھی نہیں تھی

ہم جیتے بھی آخر تو کس امید پہ جیتے
پاس اپنے تو کچھ درد کی دولت بھی نہیں تھی

کیا حال ہے اُس صاحبِ دستار سے پوچھو
اپنی تو یہاں پر کوئی عزت بھی نہیں تھی

یہ اہلِ خرد چاک گریبان سے کیوں ہیں؟
کچھ اتنی جنوں خیز تو وحشت بھی نہیں تھی

کہنے کو تو ہم سچ کے طرفدار تھے لیکن!
سچ کہنے کی ہم لوگوں میں عادت بھی نہیں تھی

کیوں لوگ بلاتے ہیں ترے نام سے مجھ کو
مجھ کو تو ترے نام سے نسبت بھی نہیں تھی