1. ہوم
  2. غزل
  3. شاہد کمال
  4. پھر کوئی دست خوش آزار مجھے کھینچتا ہے
Shahid Kamal

پھر کوئی دست خوش آزار مجھے کھینچتا ہے

پھر کوئی دست خوش آزار مجھے کھینچتا ہے
جذبہ عشق سرِ دار مجھے کھینچتا ہے

میں محبت کے مضافات کا باشندہ ہوں
کیوں ترا شہرِ پُر اسرار مجھے کھینچتا ہے

یہ بھی حیرت ہے عجب، خود مری تمثال کے ساتھ
آئینہ بھی پسِ دیوار مجھے کھینچتا ہے

دم بھی لینے نہیں دیتا ہے مسافت کاجنون
پَا برہنہ وہ سرِ خار مجھے کھینچتا ہے

پھر کوئی تیر ہدف کرتا ہے مشکیرہ کو
پھر کوئی دستِ کماں دار مجھے کھینچتا ہے

بولیاں جس کی لگے میں کوئی یوسف تو نہیں
کس لئے مصر کا بازار مجھے کھینچتا ہے

ہے کوئی گریہ کن حرف پسِ خیمہ جاں
پھر کوئی نالہ آزار مجھے کھینچتا ہے

تجھ کو معلوم ہے شاہدؔ بھی ہے مغرور بہت
کیوں ترا حُسن انادار مجھے کھینچتا ہے