طشت از بام کردیئے جائیں
اور بدنام کردیئے جائیں
سچ بھی اپنا وجود کھو بیٹھے
اتنے اِبہام کردیئے جائیں
اِس یقیں سے تو اب یہ بہتر ہے
گردِ اَوہام کردیئے جائیں
اب متاعِ غمِ حیات کے ساتھ
دل بھی نیلام کردیئے جائیں
سب چراغانِ آفریدۂ شب
صبح ہنگام کردیئے جائیں
اِس سے پہلے ہَوا اُڑا لے جائے
خاک آرام کردیئے جائیں
نطفۂ رائیگاں نہیں ہم لوگ
وصلِِ اَرحام کردیئے جائیں
عشق محرومِ لذتِ انجام
ہم بھی نا کام کردیئے جائیں
