وہ جو کہتا ہے وہ نہیں کہتا

وہ جو کہتا ہے وہ نہیں کہتا
ایسا ہوتا ہے کیا نہیں ہوتا

آج خود مجھ کو مجھ سے ملنا ہے
آج میں تجھ سے مل نہیں سکتا

پہلے آباد تھے یہ ویرانے
اب یہاں پر کوئی نہیں رہتا

چاند روشن تھے جن منڈیروں پر
اب وہاں پر دِیا نہیں جلتا

اب یہاں قافلے نہیں آتے
اب وہ دریا یہاں نہیں بہتا

اندر، اندر سے جل رہا ہے وہ
اور باہر دھواں نہیں ہوتا

راس آنے لگی ہے صحبت غم
تیری محفل میں جی نہیں لگتا

شعر کہتے ہو ایسے تم شاہدؔ
شعر ایسے کوئی نہیں کہتا