تمھارا جیون سنوارتے بھی
بحال رہتے جو رابطے بھی
ہم ایسے بے حس نہیں تھے ہر گز
تمھاری یادوں میں جاگتے بھی
کہیں جو امید ہوتی کوئی
دیا جلا کر تلاشتے بھی
تمھارے خوابوں کی جوت جلتی
تمھاری آنکھوں میں جھانکتے بھی
پکارا ہوتا جو تم نے ہم کو
پلٹ کے تم کو پکارتے بھی
جو قرض ہوتا محبتوں میں
تمھاری خاطر اتارتے بھی
بہت اداسی کے جنگلوں میں
کوئی تو رستہ نکالتے بھی
نشان ہوتا جو منزلوں کا
مسافرت کو گزارتے بھی
گلاب رستوں کی چاہتوں میں
خزاں رتوں کو سہارتے بھی
