Sunday, 15 September 2019
/ قصیدہ / فاخرہ بتول / کپڑے مرے حسین ع کے بنوا کے لے گیا

کپڑے مرے حسین ع کے بنوا کے لے گیا

کپڑے مرے حسین ع کے بنوا کے لے گیا

جبریل رب کی مرضیاں آ آ کے لے گیا

 

آیا فلک سے روٹیاں لینے کو کس لیے؟ 

لنگر مرے حسین ع کا منگوا کے لے گیا

 

اور ماتمی حسین ع کا اتنا ھے لاڈلا

قسمت مرے حسین ع سے لکھوا کے لے گیا

 

جنت کو اِس قدر کیا سستا حسین ع نے

حُر آکے اپنی جھولی کو پھیلا کے لے گیا

 

فطرس پروں بغیر بہت ہی اُداس تھا

آ کر حسین ع سے نئے بنوا کے لے گیا

 

آئی ندا نصیب میں بیٹے نہیں ترے

راہب مرے حسین ع سے لکھوا کے لے گیا

 

جس کو کہیں سے کچھ نہ ملا باخدا بتول! 

آیا درِ حسین ع سے وہ آ کے لے گیا

فاخرہ بتول

فاخرہ بتول نقوی ایک بہترین شاعرہ ہیں جن کا زمانہ معترف ہے۔ فاخرہ بتول نے مجازی اور مذہبی شاعری میں اپنا خصوصی مقام حاصل کیا ہے جو بہت کم لوگوں کو نصیب ہوتا ہے۔ فاخرہ بتول کی 18 کتب زیور اشاعت سے آراستہ ہو چکی ہیں جو انکی انتھک محنت اور شاعری سے عشق کو واضح کرتا ہے۔ فاخرہ بتول کو شاعری اور ادب میں بہترین کارکردگی پر 6 انٹرنیشنل ایوارڈز مل چکے ہیں۔