1. ہوم/
  2. نظم/
  3. فاخرہ بتول/
  4. فلسطین۔ ۔ ۔ ۔ !

فلسطین۔ ۔ ۔ ۔ !

لیلیٰ کے پاؤں میں سُرخ گلاب مہکتا،

سسک رہا ھے

آبلوں میں صدیوں کی کہانی

آنکھوں میں گہرا سنٌاٹا،

ہُو کا عالم

شام گھنیری،

رم جھم اوس میں بھیگی پلکیں،

چیتھڑے تن پر، ہاتھ میں بستہ

اور بستے کے اندر ماں کے خواب ادھورے

آزادی کے، بیداری کے، ایک چمن کے،

امن، محبت اور وطن کے

ماں کہتی تھی

اِس مٹی میں خون سے لکھٌے افسانے ہیں

بیٹوں کے بے گور کفن لاشوں کے دھبے،

دھرتی کے ماتھے پر دیکھو، چمک رہے ہیں

اور ناموس کے لال دوپٹے،

لیر و لیر ہوئے جاتے ہیں

تتلی مُٹھی میں جب آئی

پھولوں نے دی خوب دُھائی

پتی پتی پھول ہوا ھے

آخر اِس میں کس کی خطا ھے؟

لیلیٰ کی جب لاش ملی تو

اُس کے ہاتھ میں اک بستہ تھا،

پھٹا ہوا تھا

اور بستے کے اندر ماں کے خواب ادھورے۔ ۔ ۔

امن کہاں سے اب آئے گا؟

کون بھلا یہ بتلائے گا؟


فاخرہ بتول

فاخرہ بتول نقوی ایک بہترین شاعرہ ہیں جن کا زمانہ معترف ہے۔ فاخرہ بتول نے مجازی اور مذہبی شاعری میں اپنا خصوصی مقام حاصل کیا ہے جو بہت کم لوگوں کو نصیب ہوتا ہے۔ فاخرہ بتول کی 18 کتب زیور اشاعت سے آراستہ ہو چکی ہیں جو انکی انتھک محنت اور شاعری سے عشق کو واضح کرتا ہے۔ فاخرہ بتول کو شاعری اور ادب میں بہترین کارکردگی پر 6 انٹرنیشنل ایوارڈز مل چکے ہیں۔