دردِ دل آج شب انتہا تک چلا
تیرا بیمار دارِ فنا تک چلا
شہرِ مقتول میں ہر طرف بے حسی
ہاتھ جس کا اٹھا، بد دعا تک چلا
طفل نیزوں میں ظالم پروتے رہے
حکم منصف کا بس اک صدا تک چلا
گھر سے باہر وہ دہشت کا ماحول ہے
در سے جو بھی گیا نقشِ پا تک چلا
میں یہ شب گیر آہیں سناؤں کسے
میرا غم بھی بس آہ و بکا تک چلا
اک سفر آگہی کا کیا میں نے یوں
جب چلا میں تو شامِ بلا تک چلا
عشق کا گھاؤ گہرا ہے کتنا کھرل
جو جوانی سے لے کر قضا تک چلا
