زمینِ شعر میں کچھ ایسے خواب بُنتا ہوں
خجل ہو چرخ میں وہ آفتاب بُنتا ہوں
خراج لے کے میں کچھ روشنی کا سورج سے
محبتوں کا نیا ماہتاب بُنتا ہوں
سکوتِ شب میں کسی دلربا تصور سے
سمندروں کا میں اک اضطراب بُنتا ہوں
غمِ حیات دکھا کر جنونِ تیرہ میں
سحر کے چہرے پہ اک انقلاب بُنتا ہوں
زوالِ عقل نہ ہو اور پیاس بھی نہ رہے
درونِ دل وہ خیالِ شراب بُنتا ہوں
ادائے حُسنِ مجسم دکھائی دے عریاں
میں ایسا آنکھ کے اوپر نقاب بُنتا ہوں
