تقدیر پر لگے تو لگے ابلہی کا داغ
ظاہر کریں گے ہم نہ تری بے رخی کا داغ
ہم سے جو اس جہاں میں ہوا جرمِ بندگی
لے کر جبیں پہ گھوم رہے ہیں اُسی کا داغ
میں نے فقط لکھی تھی غمِ دل کی داستاں
دامن پہ یوں لگا ہے مرے عاشقی کا داغ
آیا ہے مجھکو دیکھنے خورشید بام تک
لیکن مجھے عزیز ہے تیرہ شبی کا داغ
وہ گفتگو خلوص بھری خواب ہوگئی
لہجے پہ تیرے جب سے لگا خسروی کا داغ
جب تک نہ دے گا مجھ کو کھرل جامِ وصل وہ
کام و دہن سے جائے کہاں تشنگی کا داغ