ٹک کر کہیں نہ بیٹھے سو وحشت میں کاٹ دی
جتنی ملی تھی زندگی ہجرت میں کاٹ دی
سب کامیاب لوگ تھے مصروفِ کار اور
ہم نے ترے جہان میں فرصت میں کاٹ دی
اک اجنبی دیار میں گمنام ہم ہوئے
یعنی تمام عمر مروت میں کاٹ دی
اس کی فریب کاریاں تھیں پر کشش بہت
یوں آستیں کے سانپ کی صحبت میں کاٹ دی
جب مفلسی نے دیکھ لیا گھر کا راستہ
تجھ سے گلہ نہ کر سکا غربت میں کاٹ دی
کردار رہنما کا ترے سامنے تھا جب
کیا سوچ کر پھر اس کی اطاعت میں کاٹ دی
بیٹی کو بوجھ جان کے تُو خوف میں رہا
بن پائی کچھ نہ اور تو غیرت میں کاٹ دی
ان کو کسی غریب کا آیا نہیں خیال
شاہوں نے اہتمام سے عشرت میں کاٹ دی
انصاف اس کو قبر میں ہی مل سکا میاں
جس نے تمام عمر عدالت میں کاٹ دی
رنگِ سخن سے ہم تو بہت دور ہی رہے
ویسے تو شاعروں کی ہی صحبت میں کاٹ دی
دیکھا انہیں جو سامنے تو ہونٹ سل گئے
آئی شبِ وصال تو حیرت میں کاٹ دی
میں تو اسیرِ الفتِ جاناں رہا سہیل
اس نے وفا کی ڈور بھی عجلت میں کاٹ دی
